Түркістан облысының тауларында турист аюды жолықтырып, кездесу ерекше аяқталды

Шымкенттік турист Сайрам шыңына өрлеу кезінде аюмен небәрі бес метр қашықтықта бетпе-бет келіп, жыртқышты қауіпсіз қашықтыққа қуу үшін дронды пайдаланған.

Шымкенттің 26 жастағы тұрғыны Диас 21 тамызда досы Хан Биссакалмен бірге биіктігі 4 238 метр болатын Сайрам шыңына аттанған. Жолда олар аюды байқап қалған. «Аюды алдымен досым Хан көрді. Ол аюды үркітпек болғанда, жануар тура менің алдымнан – шамамен бес метрдей жерден жүгіріп өтті. Сол сәтте бұл маңда сегізге жуық адам болды, сондықтан қауіпсіздік үшін оны алысқа қууды жөн көрдік», – дейді ол. Туристер жануарды үркіту үшін өздерімен бірге жүрген шағын DJI дронды қолданған. Олар дронды аюға қарай бағыттап, кейін зум арқылы қашықтан бақылаған. Диастың айтуынша, бұл Түркістан тауларындағы аюмен бірінші кездесуі емес, мамыр айында да олардың бірі лагерьге дейін келген.

Орман шаруашылығы комитетінің мәліметінше, ел аумағында кәдімгі және Тянь-Шань қоңыр аюы мекендейді. Кәдімгі қоңыр аю Абай және Шығыс Қазақстан облыстарында кездессе, Қызыл кітапқа енген Тянь-Шань қоңыр аюы Батыс және Солтүстік Тянь-Шань, Жоңғар Алатауы мен «Алтын Емел» ұлттық паркінің аумағында таралған. 2020 жылдан бері Қазақстанда аюлар популяциясы өсіп, 2297-ден 3568-ге жеткен.

Мамандар мен тәжірибелі туристер қауіптің алдын алу үшін тауда қозғалыс кезінде шу шығарып, сөйлесіп жүруді, қалың бұталарға кірмеуді және қонжықтардың қасында аса сақ болуды ескертеді. Сондай-ақ артық тамақ пен қалдықтарды қалдырмай, аюды байқаған жағдайда кенет әрекеттермен ашуландырмай, қашықтықты баяу ұзарту маңызды.