Қазан айында қазақстандықтарды қандай өзгерістер күтіп тұр?
Күнтізбеде жаңа ай басталды. Онымен бірге қазақстандықтардың күнделікті өміріне әсер ететін бірқатар жаңа тәртіп пен өзгеріс те іске қосылады. Қай салада қандай жаңалық бар?
Онлайн несие рәсімдеу тәртібі өзгереді
Енді онлайн несие рәсімдеген кезде банк клиентке арнайы сауалнама ұсынады. Оның мақсаты — азаматтың алаяқтардың ықпалымен қарыз алып қоймағанын анықтау.
Күдікті жағдай байқалса, қаржы ұйымы қосымша тексеру жүргізіп, несие беруді тоқтатуы мүмкін.
Ал дербес деректердің заңсыз тарағаны анықталған жағдайда клиенттен қайта биометриялық сәйкестендіруден өту талап етілуі ықтимал.
Жұмыс іздегендерге 13 күн беріледі
1 қазаннан бастап жұмыссыз ретінде тіркелуге дейінгі кезең 2 күннен 13 күнге дейін ұзарады.
Осы уақыт ішінде мансап орталығы мамандары азаматтың еңбек тәжірибесі мен кәсіби дағдыларын саралап, оған сәйкес жұмыс табуға көмектеседі. Бұл тәртіп әзірге пилоттық жоба аясында енгізіліп отыр.
Жұмысынан айырылғандарға төлем тәртібі өзгереді
Қазаннан бастап жұмысынан айырылған азаматтарға әлеуметтік төлем тағайындау механизмі өзгереді.
Төлем мерзімі әлеуметтік сақтандыру жүйесіне қатысу өтіліне қарай белгіленіп, ең көбі үш айға дейін төленеді.
Нақты сома азаматтың орташа табысы мен әлеуметтік аударымдарына байланысты есептеледі.
Медицина қызметкерлері маска тағады
Күзгі эпидемиологиялық маусым басталуына байланысты медицина қызметкерлеріне маска тағу режимі енгізіледі. Шара тұмау, ЖРВИ және COVID-19 таралуының алдын алуға бағытталған.
Фермерлер қаржыны ертерек рәсімдейді
1 қазаннан бастап шаруалар «Кең дала 2» бағдарламасы арқылы келесі егіс маусымына қаржы рәсімдей алады.
Несие жылдық 5 пайызбен беріледі. Бұл шаруаларға тұқым мен қажетті ресурстарды алдын ала сатып алып, техниканы дайындауға мүмкіндік береді.
Ұшақтарда интернет пайда болуы мүмкін
Қазақстандағы әуе кемелерін спутниктік интернетке қосу мәселесі қарастырылып жатыр.
Бұл үшін Viasat және OneWeb технологиялары ұсынылған. Алайда Wi-Fi-дың нақты қашан іске қосылатыны және оның билет бағасына кіретіні әзірге белгісіз.
Дубайға рейстер қайта жанданады
Air Astana қазан айынан бастап Алматы мен Астанадан Дубайға тұрақты рейстерді қайта орындауды жоспарлап отыр.
Рейс жиілігі жағдайға қарай өзгеруі мүмкін. Сондықтан жолаушылар сапар алдында әуе компаниясының соңғы кестесін тексергені жөн.
