Түркістанда 30 мың тұрғынға арналған «Ынтымақ» емдеу орталығы ашылды

Республика күні мен Қала күні қарсаңында Түркістан қаласында заманауи талаптарға сай салынған жаңа «Ынтымақ емдеу орталығы» пайдалануға берілді.

Екі қабатты жаңа медициналық нысан 30 мыңға дейін тұрғынға сапалы әрі қолжетімді медициналық қызмет көрсетуге есептелген. Нысанның ашылу салтанатына қала әкімі Әзімбек Пазылбекұлы, облыстық денсаулық сақтау басқармасы басшысының орынбасары Жанболат Ділдабеков, зиялы қауым өкілдері мен шаһар тұрғындары қатысты.

Саламатты қоғам құру басты міндет екенін атап өткен қала басшысы Әзімбек Пазылбекұлы бұл орталықтың ашылуы тұрғындар бұған дейін көтерген өзекті мәселелердің нақты шешімі болғанын жеткізіп, жобаға қолдау білдірген кәсіпкерлерге алғыс айтты.

Орталықтың мүмкіндіктері мен артықшылықтары

• Бейінді мамандар: Тұрғындарға кардиолог, офтальмолог, хирург, невролог, педиатр және өзге де білікті дәрігерлер сапалы кеңес береді.

• Диагностика мен стационар: Орталықта заманауи аппаратурамен жабдықталған диагностикалық кабинеттер мен 11 төсектік күндізгі стационар жұмыс істейді.

• МӘМС жүйесі: Жаңа орталыққа тіркелген тұрғындар Миндетті әлеуметтік медициналық сақтандыру (МӘМС) пакеті аясында барлық қызметтерді тегін әрі бекітілген тәртіппен ала алады.

Жаңа медициналық нысан Түркістан тұрғындарының денсаулығын нығайтып, емханалардағы кезекті азайтуға үлкен септігін тигізеді.