Ананың бір қолы бесікті тербетсе, бір қолы әлемді тербетеді. Ал бір ауданда бес мыңнан астам Батыр ана тұратынын білгенде, еріксіз таңғаласың. Жақында Келес ауданында дәл осындай ақ жаулықты аналардың құрметіне ерекше, көз жасына ерік берген тебіреністі сәт өтті. Бұл жай ғана марапаттау емес, шынайы бақыт пен көз жасы араласқан ұмытылмас күн болды.
Келес ауданының әкімі Жәнібек Ағыбаевтың бөлмесіне кірген аналардың жүзінен толқыныс та, мақтаныш та байқалатын. Олар – түндерін ұйқысыз өткізіп, еліміздің болашағын тәрбиелеп отырған нағыз батырлар. Бұл күні аудандағы 21 ананың омырауында мемлекеттік жоғары награда жарқырады.
Алқаларын таққан сәтте кейбір аналар қуаныштан көздеріне жас алды. Марапат иелері сахнаға шығып, өздерінің ақжарма тілектері мен алғыстарын жеткізді. Олардың айтуынша, бұл марапат – тек құрмет қана емес, мемлекеттің әрбір көпбалалы отбасына деген шынайы қамқорлығының белгісі.
Ресми бөлімнен кейін аналарға арналған нағыз мереке басталды. Мәдениет саласының қызметкерлері әуезді ән мен күмбірлеген күйден шашу шашып, аналардың көңілін көтеріп, ерекше көтеріңкі көңіл-күй сыйлады.
Таңғаларлық статистика: Бүгінгі таңда тек бір ғана Келес ауданында 5 446 «Батыр ана» тұрады! Бұл – өңірдегі демографиялық өсімнің жоғары екенін және ана мен балаға деген құрметтің ерекше екенін көрсететін үлкен көрсеткіш.
