Шөл даладағы ғажайып

Түркістан облысындағы Сауран ауданында заманауи технологияның көмегімен рекордтық өнім жиналып жатыр. Жаңа Иқан ауылдық округіндегі шаруалар биыл нарықты отандық, сапалы алмамен жаулап алуды көздеп отыр.

Аптап ыстық пен су тапшылығына қарамастан, жергілікті шаруашылық 70 гектар аумақтыжайқалған алма бағына айналдырған. Бұл жердегі әр гектарға 2 мың түптен алма ағашы отырғызылған.

Құпия неде? Бақтың мұндай жетістікке жетуінің басты сыры — тамшылатып суару технологиясында. Бұл жүйе әр тамшы суды есептеп, ағаштың тамырына тікелей жеткізеді. Нәтижесінде су үнемделіп, ағаштардың өсіп-жетілуі тездейді және өнімділік бірнеше есеге артады.

Болжам: Биыл шаруалар әр түп ағаштан орта есеппен 20 келіге дейін алма жинауды жоспарлап отыр.

Қазірдің өзінде аптапқа төтеп берген бақтың 30 гектар алқабы толық жиналып үлгерді. Ал қалған 40 гектардағы өнімді жинау жұмыстары қызу жүріп жатыр.

Тек өсіру емес, сақтау да маңызды Шаруалар өнімді жинап қана қоймай, оны қыс бойы бұзылмайтын күйде сақтаудың да қамын жасауда. Қазіргі таңда бақ аумағында жеміс-жидектерді ұзақ мерзімге сақтайтын заманауи алып қойманың құрылысы жүріп жатыр.

Бұл нысан ішкі нарықты жыл бойы арзан әрі табиғи өніммен қамтамасыз етуге мүмкіндік береді.