Миллиондарға жол ашқан 5 гектар жер
Түркістан облысы жасыл желек қорын молайту бағытында қарқынды жұмысқа көшті. Аймақтағы орман шаруашылықтарының тыныс-тіршілігін көзімен көріп қайтқан Табиғи ресурстар басқармасының басшысы Ғалымжан Төлепов Ордабасы ауданындағы тұқымбаққа арнайы барып, жасыл фабриканың жұмысын жіті тексерді.
Қажымұхан елді мекенінде орналасқан 5 гектарлық бұл тұқымбақта карағаш, үйеңкі, шаған, айлант, боз арша және туя секілді ағаш түрлері өсіріледі. Қазіргі таңда көшеттерге деген сұраныстың артуына байланысты шаруашылық үш жерде уақытша ұйымдастырылып, жұмысын кеңейткен. Нәтижесінде мұнда жыл сайын 300 мыңнан астам сапалы көшет өсіріледі.
Биылғы күзгі отырғызу науқанына дайындық жұмыстары да қызу жүріп жатыр. Атап айтқанда:
- Көктемгі маусымда: 31 630 түп түрлі ағаш көшеті босатылды.
- Күзгі маусымда: 163 300 түп көшет үлестіру жоспарланған.
- Қазіргі көрсеткіш: Бүгінгі таңда 45 780 түп көшет қазылып, оның 8 580 түбі Сайрам және Ордабасы аудандарына табысталды.
Сапар барысында басқарма басшысы көшеттердің сапасын жеке тексеріп, күзгі отырғызу науқанына дайындықты пысықтады. Жауапты мамандарға көшеттерді мерзімінде, сапалы әрі қатаң талаптарға сай дайындау бойынша нақты тапсырмалар берілді.
Өңірдегі жасыл белдеу мен орман қорын ұлғайтуға бағытталған бұл жүйелі жұмыстар алдағы уақытта да жалғасып, тұқымбақ аумағын кеңейту көзделіп отыр.
