«Voice of Turan – 2026»: Түркістанда әлем әншілері қазақ әнін шырқайды
Түркістанда қазақ әнін шетелдік өнерпаздардың орындауымен тыңдауға мүмкіндік туады. 25–27 қыркүйек аралығында қалада халықаралық «Voice of Turan – 2026» фестивалі өтеді.
Өнер додасына Франция, Италия, Испания, Бразилия, Мексика, Куба, Венесуэла, Индонезия, Тунис, Грузия, Армения, Қырғызстан, Беларусь, Болгария, Сан-Марино, Ватикан және басқа да елдерден әншілер қатысады.
Фестивальге арнайы келген шетелдік қонақтар Түркістанда ұлттық салт-дәстүрмен танысып, қаланың тарихи-мәдени орындарын аралады. Қонақтарға қазақтың мәдениеті мен дәстүрі таныстырылды.
Үш күндік бағдарламада отандық және шетелдік орындаушылар қазақ композиторларының шығармаларын орындайды. Сонымен қатар шығармашылық кездесулер мен мәдени іс-шаралар ұйымдастырылады.
Фестивальдің басты ерекшелігі – қазақ әнінің шетелдік орындаушылардың репертуарында шырқалуы. Бұл арқылы қазақ музыкасы халықаралық өнер кеңістігінде таныстырылады.
Айта кетейік, «Voice of Turan» халықаралық фестивалі биыл жетінші рет ұйымдастырылып отыр.
