Суды үнемдеу – басты талап: егіс алқаптары қысқарып, жаңа технологиялар енгізілді

Қазақстанда биылғы көктемгі егіс науқаны су ресурстарын үнемдеуге бағытталған жаңа тәсілдермен басталды. Күріш алқаптары қысқарып, тамшылатып суару көлемі айтарлықтай артты, деп хабарлайды turkistanlife.kz

Көктемгі дала жұмыстарына дайындық барысында су тұтынуды азайту мәселесіне ерекше назар аударылды. Мемлекеттік органдар мен өңірлердің бірлескен жұмысының нәтижесінде су ресурстарын тиімді пайдалану тетіктері күшейтіліп отыр.

Атап айтқанда, күріш егістігі 20,2 мың гектарға қысқартылды. Оның ішінде Қызылорда облысында – 10,9 мың гектар, Түркістан облысында – 7,4 мың гектар, ал Алматы облысында – 1,9 мың гектарға азайды. Бұл шешім су тапшылығының алдын алуға бағытталған.

Сонымен қатар мақта шаруашылығында су үнемдеу технологиялары кеңінен енгізілуде. Тамшылатып суару алаңы 29,8 мың гектарға ұлғайып, жалпы 79,8 мың гектарға жетті. Ал дәстүрлі суару әдістері 12 мың гектарға қысқарып, 82,6 мың гектарды құрады. Бұл тәсілдер су шығынын азайтып, өнімділікті арттыруға мүмкіндік береді.

Биылғы жылы жалпы егіс алқабы 23,8 млн гектарды құрап, өткен жылмен салыстырғанда 180 мың гектарға артты. Егіс құрылымын әртараптандыру нәтижесінде су аз қажет ететін дақылдардың үлесі көбейді. Мәселен, майлы дақылдар көлемі 4 млн гектардан асып, мал азықтық дақылдар 3,3 млн гектарға жетті.

Оңтүстік өңірлерде егіс науқаны басталып, қазірдің өзінде 202 мың гектар жерге егін егілді. Қалған аймақтарда дайындық жұмыстары қарқынды жүргізілуде. Тұқым қоры 2,3 млн тоннаны құрап, сапасы толық талапқа сай екені анықталған.

Дала жұмыстарын уақытылы жүргізу үшін аграршыларға 402 мың тонна жеңілдетілген дизель отыны бөлінді. Ал ауыл шаруашылығы техникасының дайындығы 90%-ға жетті.

Жалпы алғанда, су үнемдеу технологияларын енгізу, егіс құрылымын оңтайландыру және су пайдалану шектерін сақтау – биылғы науқанның басты басымдығы. Бұл шаралар су ресурстарына түсетін жүктемені азайтып қана қоймай, тұрақты әрі мол өнім алуға мүмкіндік береді.