Түркістанның «Тұран» командасы чемпионат көшбасшысын жеңіп, Премьер-лигаға жолдама алды

Түркістандық «Тұран» футбол клубы Қазақстанның Бірінші лигасындағы 25-тур аясында өз алаңында маңызды жеңіске қол жеткізді. Турнир кестесінің көшбасшысы — Қарағандының «Шахтер» командасын 1:0 есебімен тізе бүктірген жерлестеріміз Қазақстан Премьер-лигасына (КПЛ) мерзімінен бұрын жолдама алды.

Тартысты өткен матчты Түркістан облысының әкімі Нұралхан Көшеров арнайы барып тамашалап, жергілікті футболшыларға қолдау білдірді. Өңір басшысының жанкүйерлік танытуы алаң иелеріне қосымша жігер сыйлады.

Ойынның алғашқы кезеңінде «Тұран» футболшылары айқын басымдық танытқанымен, таблодағы есепті өзгерте алмады. Десе де, екінші таймда түркістандықтар көздеген мақсатына жетті.

• 70-минут: Арман Кенесовтің дәл берген пасын Матвей Герасимов баспен қарсылас қақпасына дөп бағыттап, матчтың жалғыз әрі жеңісті голын соқты!

Қарағандылық «Шахтер» бұл турға дейін-ақ Бірінші лиганың чемпионы атанып үлгерген болатын. Ал осы жеңістен кейін «Тұран» 54 ұпай жинап, турнир кестесінде үшінші орынға табан тіреді.

Ең басты қуанышты жаңалық — бұл жеңіс Түркістан клубына 2027 жылғы маусымда Қазақстан Премьер-лигасында (КПЛ) өнер көрсету құқығын сыйлады! Жоғары дивизионға қайта оралу өңірдегі бұқаралық және кәсіби спорттың дамуына жаңа серпін бермек.