Көпшілігіміз «бизнес бастау үшін миллиондар керек» деп қол қусырып отырғанда, Кентаудың бір анасы нағыз ерліктің үлгісін көрсетті.
Қарнақ ауылының тұрғыны, көпбалалы ана Ойдин Бабаханова бір орында отыруды жөн көрмеді. Ол тәуекелге бел буып, мемлекеттік қайтарымсыз грантқа өтінім берді. Нәтиже? Бүгінде оның 10 соттық жерінде жап-жасыл бау-бақша емес, нағыз «дәрумендер фабрикасы» бой көтерді.
Ойдин ханымның қасында жары мен балалары иық тіресе еңбек етіп жүр.
«Мемлекеттің берген гранты біздің арманымызға қанат бітірді. Қазір бұл — бүкіл әулетіміздің ортақ ісі», — дейді кейіпкеріміз мақтанышпен.
Ерте көктемде егілген қызанақтар бүгінде қып-қызыл болып пісіп тұр. Ойдин Бабаханованың жоспары ауқымды. Алғашқы маусымның өзінде-ақ осындай рекордтық көрсеткіш күтілуде. Жақын арада Кентау мен Түркістан қалаларының дүкен сөрелерінде Қарнақтың балғын, табиғи өнімдері пайда болады.
Бұл оқиға «екі қолға бір күрек» тапқан адамның ешқашан аш қалмайтынының дәлелі. Грант — мүмкіндік, ал еңбек — табыстың кілті.
