Медальдан кейін пәтер бұйырды
Түркістан облысында спортшылардың еңбегі елеусіз қалған жоқ. Спорт күніне арналған салтанатты шарада халықаралық жарыстарда ел намысын қорғаған чемпиондарға пәтер кілттері табысталды.
Мерекелік жиында облыс әкімі Нұралхан Көшеров спорт саласының ардагерлері, жаттықтырушылар, спортшылар мен сала мамандарын кәсіби мерекесімен құттықтады.
Салтанатты шарадағы ең қуанышты сәттердің бірі – спортшыларға баспана кілттерінің табысталуы болды. Өңір басшысы Токиода өткен XXV жазғы Сурдлимпиадалық ойындарының жеңімпаздарына 2 және 3 бөлмелі пәтерлердің кілттерін берді. Ал еркін күрестен жасөспірімдер арасындағы әлем чемпионатының жүлдегерлеріне қаржылай сыйақы табысталды.
Бұл – татамиде, кілемде немесе спорт алаңында жеңіс үшін тер төккен спортшыларға көрсетілген қолдаудың нақты бір көрінісі.
Түркістан спортшыларының биылғы нәтижесі де аз емес. 2026 жылдың алғашқы 7 айында өңір спортшылары 876 медаль жеңіп алған. Оның 15-і – әлем чемпионаттарынан, 66-сы – Азия чемпионаттарынан, 795-і – Қазақстан чемпионаттарынан келген жүлделер.
Жеңіс мұнымен тоқтап тұрған жоқ. Биыл түркістандық спортшылар халықаралық додаларға қатысуға 60 лицензия иеленді. Оның ішінде Жапонияның Айти–Нагоя қаласында өтетін XX Азия ойындарына 35 спортшы, Пара Азия ойындарына 5 спортшы жолдама алды. Ал Қырғызстанның Бішкек қаласында өтетін VI Дүниежүзілік көшпенділер ойындарында Түркістан облысының 20 спортшысы ел намысын қорғайды.
Бүгінде өңірде спортпен айналысатындардың қатары да қалың. Облыста 493 мемлекеттік және жеке спорт ұйымы жұмыс істейді. Мұнда 89 мыңнан астам спортшы спорттың 62 түрімен тұрақты айналысады. Ал дене шынықтырумен жүйелі түрде шұғылданатын тұрғындар саны 866 мыңнан асып, жалпы халықтың 43,4 пайызына жеткен.
Спортқа қызығушылық артқан сайын оған қажетті жағдай да көбейіп келеді. Қазір Түркістан облысында 3 595 спорт нысаны бар. Биыл тағы 62 нысанды аяқтау жоспарланған. Олардың қатарында спорт кешендері, залдар, футбол манеждері, спорт алаңдары мен стрит-воркаут алаңдары бар.
Мерекелік жиында спорт саласына еңбегі сіңген азаматтар да назардан тыс қалмады. Бір топ маман Грамоталармен және Алғыс хаттармен марапатталып, «Құрметті спорт қызметкері» төсбелгісі мен «Еңбек ардагері» медалі табысталды.
Шара соңында спортшылардың жетістіктері қойылған көрме ұйымдастырылып, мерекелік концерт өтті.
Бір күндік мерекеден бөлек, бұл шараның мәні басқа. Спорттағы жеңіс – тек медаль емес. Оның артында жылдар бойғы жаттығу, тәртіп, жарақатқа қарамай еңбек ету және ел намысын қорғау тұр. Ал чемпионға табысталған баспана кілті – сол еңбектің еленгенін көрсететін нақты қолдау.
