Отырар ауданы: Қостүйін ауылы табиғи газға қосылды
Отырар ауданына қарасты Қостүйін елді мекенінде көптен күткен көгілдір отын салтанатты жағдайда берілді.
Бұл маңызды инфрақұрылымдық жоба ауыл тұрғындарының тұрмыс сапасын жаңа деңгейге көтеріп, өңірдегі газдандыру жұмыстарына тың серпін берді, деп хабарлайды turkistanlife.kz
Түркістан облысындағы елді мекендерді заманауи инженерлік жүйелермен қамту жұмыстары жүйелі түрде жалғасуда. Осы бағыттағы кезекті нысанның ашылу рәсіміне аудан әкімі Қайрат Жолдыбайұлы мен аудандық мәслихат төрағасы Уалихан Жамалханұлы арнайы қатысты. Ауыл шетіндегі газ тарату бекетін іске қосу шарасы жергілікті тұрғындар үшін нағыз мерекеге айналды.
Аудан басшысы өз сөзінде бұл бастаманың әлеуметтік маңызына тоқталып, мемлекет тарапынан жасалып жатқан қолдаудың нақты нәтижесі екенін атап өтті.
«Табиғи газдың ауылдарға кезең-кезеңімен тартылуы — халықтың әл-ауқатын жақсартуға бағытталған жүйелі жұмыстың көрінісі. Бұл тек тұрмыстық қолайлылық қана емес, сонымен бірге ауылдың әлеуметтік-экономикалық дамуына, кәсіпкерліктің жандануына берілген тың серпін», — деді Қайрат Жолдыбайұлы.
Бүгінгі таңда Отырар ауданы бойынша барлығы 21 елді мекен орталықтандырылған газ жүйесіне қосылып отыр. Статистикалық мәліметтерге сүйенсек, өңірдегі газдандыру деңгейі жыл санап артып, инфрақұрылымды жаңғырту бағытындағы ауқымды жобалар өз жемісін беруде. Шара барысында Қостүйін ауылының ақсақалдары ел игілігі жолындағы игі істерге ризашылығын білдіріп, ақ баталарын берді.
Аудандық маңызы бар бұл жоба алдағы уақытта көршілес елді мекендерді де қамтуды көздейді. Газдандыру жұмыстарының қарқыны Отырар өңірінің толықтай «көгілдір отынға» көшуіне мүмкіндік береді деп күтілуде.
